Presidenti i Republikës ka dekretuar 9 majin 2027 si datën e zhvillimit të zgjedhjeve vendore në Shqipëri.

Zgjedhjet për organet e qeverisjes vendore në Shqipëri do të zhvillohen më 9 maj 2027. Data është dekretuar nga Presidenti i Republikës, pas konsultimeve me përfaqësues të forcave politike dhe Komisionerin Shtetëror të Zgjedhjeve.

Sipas Kodit Zgjedhor, zgjedhjet vendore duhet të zhvillohen gjatë pranverës, në një nga katër të dielat e periudhës ndërmjet 15 prillit dhe 15 majit. Data 9 maj 2027 është propozuar nga Komisioneri Shtetëror i Zgjedhjeve, me argumentin se krijon më shumë kohë për përgatitjet dhe marrjen e masave të nevojshme për organizimin e procesit zgjedhor.

Konsultimet në Presidencë, disa parti nuk iu përgjigjën ftesës

Në konsultimet e zhvilluara nga Presidenti i Republikës morën pjesë përfaqësues të Partisë Socialiste, Partisë Socialdemokrate dhe Komisioneri Shtetëror i Zgjedhjeve.

Sipas njoftimit të Presidencës, subjektet e tjera politike nuk iu përgjigjën thirrjes për konsultim dhe nuk shprehën parapëlqime lidhur me datën e zhvillimit të zgjedhjeve vendore.

Pas përfundimit të konsultimeve dhe shqyrtimit të propozimit të Komisionerit Shtetëror të Zgjedhjeve, kreu i shtetit vendosi të dekretojë datën 9 maj 2027 për mbajtjen e zgjedhjeve.

Presidenti: Data e zgjedhjeve nuk synon të favorizojë asnjë forcë politike

Presidenti theksoi se përcaktimi i datës 9 maj nuk synon të favorizojë asnjë palë politike dhe nuk duhet të ndikojë në shprehjen e vullnetit të lirë të zgjedhësve.

Ai u bëri thirrje forcave politike të marrin pjesë në procesin zgjedhor me kandidatë dhe programe konkrete, duke respektuar legjislacionin në fuqi dhe standardet demokratike.

Kreu i shtetit kërkoi gjithashtu bashkëpunim me Komisionin Qendror të Zgjedhjeve për garantimin e një procesi të drejtë, konkurrues dhe transparent.

Me dekretimin e datës 9 maj 2027, përcaktohet afati i zhvillimit të zgjedhjeve të ardhshme për organet e qeverisjes vendore në Shqipëri, duke u krijuar institucioneve përgjegjëse dhe subjekteve politike mundësinë për të vijuar përgatitjet për procesin zgjedhor.

Burimi: Scantv